काठमाडौंमा गत चैत १५ गते भएको हिंसात्मक प्रदर्शनको क्रममा एक पत्रकारको मृत्यु भएपछि उर्लाबारीस्थित सञ्चार क्लब नेपालले उक्त घटनाको निष्पक्ष छानबिन तथा दोषीलाई कारबाहीको माग गर्दै इलाका प्रशासन कार्यालय, उर्लाबारीलाई ज्ञापनपत्र बुझाएको छ।

मंगलबार दिउँसो क्लबले प्रशासन कार्यालयका प्रमुख महेशराज तिम्सिनामार्फत नेपाल सरकारलाई विभिन्न माग राख्दै ज्ञापनपत्र हस्तान्तरण गरेको हो।

ज्ञापनपत्रमा काठमाडौंको तीनकुनेमा भएको हिंसात्मक प्रदर्शनका क्रममा निजी भवनमा आगजनी हुँदा सोही भवनको माथिल्लो तलामा समाचार संकलन गरिरहेका एभिन्यूज टेलिभिजनका पत्रकार सुरेश रजकको मृत्यु भएको घटनाप्रति क्लबले गहिरो दुःख व्यक्त गरेको छ।

यस्तै क्लबले यो घटना सुनियोजित हत्या हुनसक्ने आशंका व्यक्त गर्दै यसको निष्पक्ष छानबिन गरी दोषीलाई कानुनी कारबाही गर्न माग गरेको छ।

क्लबका महासचिव तिलक नेपालीद्वारा हस्ताक्षरित सो ज्ञापनपत्रमा मृतक पत्रकारका परिवारलाई राहत तथा उचित परिपूर्ति उपलब्ध गराउन समेत सरकारसमक्ष अनुरोध गरिएको छ।

यस्ता छन् मागहरु:
१. पत्रकार सुरेश रजकको मृत्युको निष्पक्ष छानबिन गरी दोषीलाई कडा कारबाही गरियोस्। साथै, मृतक पत्रकारका परिवारलाई उचित राहत तथा परिपूर्ति प्रदान गरियोस्।

२.अन्नपूर्ण पोस्ट दैनिकको कार्यालय, कान्तिपुर टेलिभिजनको भवन, हिमालय टेलिभिजनको गाडी तथा अन्य सञ्चारमाध्यममाथि भएको तोडफोड र आक्रमणको क्षतिपूर्ति दिलाइयोस्।

३.हिंसात्मक प्रदर्शनका क्रममा घाइते भएका पत्रकारहरूको उपचारको उचित व्यवस्था गरियोस्।

४. शान्तिपूर्ण प्रदर्शनको अधिकारलाई सम्मान गर्दै, पत्रकार तथा सञ्चारमाध्यममाथि हुने अराजक आक्रमण रोक्न सरकार गम्भीर पहल गरियोस्।

५. लोकतान्त्रिक गणतन्त्रको रक्षा गर्दै, यस्ता अराजक गतिविधिहरूलाई नियन्त्रण गर्न आवश्यक कडा कदम चालियोस्।

यस्तै क्लवले पत्रकारहरूको सुरक्षालाई उच्च प्राथमिकता दिन आग्रह गर्दै यस्ता घटनाको पुनरावृत्ति रोकी सरकारलाई आवश्यक कदम चाल्न समेत अनुरोध गरेको छ।